საქართველოს ტექნიკური უნივერსიტეტის ვლადიმერ ჭავჭანიძის სახელობის კიბერნეტიკის ინსტიტუტმა განიცადა მძიმე დანაკლისი, ჩვენს რიგებს მოულოდნელად გამოაკლდა თვალსაჩინო მეცნიერი, მათემატიკოსი, ფიზიკა-მათემატიკის მეცნიერებათა დოქტორი, თსუ-ს ასოცირებული პროფესორი და სტუ-ს კიბერნეტიკის ინსტიტუტის სამეცნიერო საბჭოს თავმჯდომარე რევაზ გრიგოლია. იგი იყო ალგებრული ლოგიკის გამოჩენილი სპეციალისტი. მან გადაჭრა n-ნიშნა ლუკასევიჩის ლოგიკების და მათი შესაბამისი ალგებრული მოდელების, MVn ალგებრების აქსიომატიზაციის პრობლემა. რევაზ გრიგოლია, იტალიელ მეცნიერ ანტონიო დინოლასთან და სხვა უცხოელ მეცნიერებთან ერთად, არის თავისუფალი და პროექციული MV და MMV ალგებრების და მათი უნიფიკაციის პრობლემების კვლევებთან დაკავშირებული მრავალი ნაშრომის ავტორი. აღსანიშნავია მისი მონოგრაფია (ა.დინოლასა და ე.ტურუნენთან ერთად) “Fuzzy Logic of Quasi-Truth: An Algebraic Treatment” (2016).
რევაზ გრიგოლია ყოველთვის გამოირჩეოდა უაღრესად პატიოსანი, პრინციპული და პუნქტუალური დამოკიდებულებით სამეცნიერო კვლევების მიმართ. დიდია მისი ღვაწლი კიბერნეტიკის ინსტიტუტის სამეცნიერო პროდუქტიულობის გაზრდის თვალსაზრისით. მისი ხელმძღვანელობით ინსტიტუტის სამეცნიერო საბჭოზე იხილებოდა მრავალი მნიშვნელოვანი და აქტუალური საკითხი ინსტიტუტის სამეცნიერო მოღვაწეობის სფეროში.
განსაკუთრებული აღნიშვნის ღირსია მისი ადამიანური თვისებები — უაღრესად კორექტული, თბილი დამოკიდებულება კოლეგების მიმართ და, ამავე დროს, პრინციპულობა ინსტიტუტისთვის საჭირბოროტო საკითხების გადაწყვეტისას.
ინსტიტუტის თანამშრომლები მუდამ იქნებიან მადლიერი ბატონი რეზოსი ინსტიტუტისთვის გაწეული სამსახურის გამო. მისი ნათელი ხსოვნა სამუდამოდ დარჩება კიბერნეტიკის ინსტიტუტის ისტორიაში.
საქართველოს ტექნიკური უნივერსიტეტის
ვლადიმერ ჭავჭანიძის სახელობის
კიბერნეტიკის ინსტიტუტის თანამშრომლები
